Riba situacion di hospital DVG cu suplica na comunidad, pa yuda alivia e situacion
ARUBA- 14.01.2024. Nos Hospital dr Horacio Oduber Hospital recientemente a informa cu pa motibo di un aumento den cantidad di pashent interna den e dianan cu a pasa pa motibonan manera entre otro accident, uzo di alcohol, maltrato, problemanan respiratorio y otronan. Y teniendo na cuenta cu e construccion y renobacion di hospital tambe ta limita nan capasidad. A tuma e desicion di pone un stop temporario na tur pashent cu ta planea pa haci operacion (operacion electivo). E situacion aki sigur ta uno hopi fastioso pa esnan cu tin cita pa opera.
Pa por alivia e sitacion aki Departamento di Salud Publico ta haci un suplica na comunidad pa ta mas cauteloso y cuida nan salud den e dianan cu ta sigui pa evita cu mester keda interna den hospital pa un situacion cu por a wordo preveni.
Mirando cu Aruba ta sigui den un temporada di hopi actividad di Carnaval e conseho na comunidad ta pa evita di keda interna den hospital door di:
- Limita uzo di alcohol, uzo di alcohol ta baha bo defensa cu e consequencia cu bo por bira malo mas lihe.
- No bebe alcohol y maneha vehiculo di motor, esaki por conduci na accident pa cual motibo tin pa wordo interna den hospital.
- Evita contacto cu hende cu sintoma di griep y si bo ta malo cu sintoma di griep, no bay den publico. Keda cas y recupera. Un griep mal cuida por desaroya den complicacion.
- Aplica tur medida di hygiena manera laba man frecuentemente, y es cu ta den grupo di risico manera mucha bou 5 aña, hende muhe na estado, adulto mayor di 65 aña y esnan cu un of otro malesa cronico of un sistema inmunilogico comprometi pa motibo di un malesa pa usa tapa boca si ta nesesario.
- Come saludabel, haci actividad fisico y hidrata bo mes cu likido cu no tin hopi sucu y bebe bo remedinan manera ta ser prescribi.
- Ta urgi esnan den grupo di risico pa vacuna contra Influenza y COVID tur aña
Es cu tin sintoma di griep ta wordo suplica pa tuma contacto cu nan dokter di cas tempran pa esaki por monitor y guia bo den e proseso di recuperacion. No warda te ora cu bo ta sinti hopi malo pa bay pidi asistencia medico na SEH. Cu asistencia di dokter di cas tempran por evita cu mester wordo interna den hospital.
Pa mas informacion like nos Facebook page Directie Volksgezondheid DVG Aruba, Follow nos riba Instagram directie_volksgezondheid_aruba, subi nos website www.dvg.aw, yama nos na 5224200 of mail nos na [email protected]
- Aruba cu caso di Dengue interna na hospital DVG ta alerta comunidad pa yuda stop e transmision di Dengue
- No tin motibo pa alerta Aruba no tin brote di Dengue
- Cuido Salud Hubenil y Wit Gele Kruis a firma convenio pa cu intercambio di informacion riba desaroyo y salud di muchanan
- Instituto di calidad ta informa Tur organisacion den cuido mester registra anualmente
- Riba situacion di hospital DVG cu suplica na comunidad, pa yuda alivia e situacion
