Cien aña pasa no tabatin un hospital, ni ambulans y ora un hende di menos recurso tabata sinti malo e tabata bishita un curioso of curandero y cu remed’i tera tabata combati malesa ora tabata sinti malo. Cada pasa tanto tempo Aruba tabata haya bishita di un dokter, mayoria di decendencia Hulandes, cu tabata bin di Corsow pa pasa cas pa cas riba su burico pa check salud di hende.
E prome dokter Rubiano tabata Horacio Eulogio Oduber na 1880 y tabata e unico dokter den su tempo. Pa haya cuido medico mas lihe, e habitantenan cu placa tabata bay Corsow cu boto of otro pais den vecindario. Cuido na Aruba pa falta di hospital tabata sosode bou circumstancia primitivo y den caso di emergencia cu mester opera tabata uza rom como narcose.
Te na fin di 1917 a firma e documento ‘Verordening Openbare Gezondheidsdienst in de kolonie Curacao”. E ordenansa aki tabata trabou di Dokter Waterman pa oficialisa salud publico na Aruba. Riba insistencia di Dr.Waterman a cuminsa herbe awa cu tabata destina pa bebe. El a pone hopi enfasis riba higiena, pero tambe riba prevencion y combatimento di malesanan contagioso. Su otro tareanan tabata inspeccion di salubridad, pero tambe scolnan.
Danki na dokter Hopkins di Merca cu a establece su mes na Aruba na 1915, cu a acerca Monseigneur Vuylsteke pa yuda pone e prome hospital riba pia na 1920, Hospital San Pedro di Verona, cu na prome instancia tabata landhuis Sividivi cu bario Sividivi ainda ta carga e number di antes. Hunto cu e hospital aki tambe e prome ambulans a keda cumpra y tabata costa 5000 florin e tempo ey. Soeurnan di Hulanda tabata dispuesto pa duna cuido na e enfermonan. Asina salud publico poco poco a haya mas nificacion. Enfasis riba combatimento di malesanan contagioso y higiena a pone cu algun ley a bin na vigor.
E prome vacuna cu a keda aplica cerca mucha tabata trata di koepokken, esta viruela. Tur mucha cu kier a bay scol tabata exigi di nan pa nan tin nan pokkenbrief, como comprobante cu nan a keda vacuna. Na fin di e añanan trinta a introduci lechi di scol pa combati malnutricion bou muchanan di scol.
Cu binida di Lago Oil Company tambe a bin LAGO hospital na 1929 pa cuido medico di su trahadonan y famia. Hopi ta esnan cu a nace den e hospital aki y a haya automaticamente nan vacunanan. Pero ora LAGO a cera su portanan na 1985 ya e hospital aki no tabata existi mas.
Na 1956 e edificio actual a cuminsa funciona como Gezondheidsdienst y tabata ubica entre otro oficina di dokter, un camber pa saca rontgen, ambulance dienst y hygienische dienst. Adres tabata Hospitaalstraat. E edificio cu su letrero ‘Gezondheidsdienst” a keda declara un monumento, ya cu e ta cumpli cu e exigencianan pa carga e seyo di monumento.
Un comunidad saludabel cu tin e sentido di responsabilidad pa su propio salud.
Promove salud y bienestar fisico, mental y social, preveni malesa, lesion y handicap y percura pa e condicionnan esencial pa crea un ambiente den cual comunidad completo di Aruba por hiba un bida saludabel.
Caya Ing. Roland Lacle 4
Tel +297 522 4200
Fax +297 582 6436
E-mail [email protected]
Orario di servicio
7.30 - 12:00 / 1.00 - 4.30
Orario di cahera
8.00 - 11.45 / 1.00 - 3.30
