Directie Volksgezondheid

Servicio Cuido Salud Hubenil ta responsabel pa e cuido preventivo di nos muchanan y hobennan na Aruba. Cuido Salud Hubenil tin como meta proteha y promove e salud y social-emocional mental y fisico di tur mucha y hoben entre 0 te cu 18 aña. Cuido Salud Hubenil pa cu esaki ta traha hunto cu Wit Gele Kruis (WGK). Dokternan di Cuido Salud Hubenil ta wordo poni na disponibilidad di WGK pa tene consulta pa babynan. Cuido Salud Hubenil ta bishita scolnan primario y basico y riba indicacion ta bishita tambe scolnan secundario. Seccion Cuido Salud Hubenil ta traha hunto cu instancianan y personanan cu ta traha pa salud di muchanan y hobennan na Aruba.

Cuido Salud Hubenil ta logra su metanan door di eherce e siguiente activadadnan.

• Chekeo medico preventivo na cierto edadnan y investigacion riba indicacion;
• Coleccion di informacion sistematico y investigacion cual ta duna informacion di e salud di muchanan y hobennan;
• Ehecucion y registracion di e programa nacional di vacunacion;
• Duna conseho y guia na mucha, mayor, scol y na funccionarionan di maneho riba topiconan cu ta trata salud y desaroyo di muchanan y hobennan;
• Informacion y charla riba topico di salud.

Vacuna cu ta wordo ofreci ta:

• DKTP (Diphtheria, Kinkhoest, Tetanus and Polio)
• MMR (Measles, Mumps and Rubella)
• HPV (Human Papilloma Virus)
• Hepatitis-B
• Pneumococcen

Certificado di Vacunacion

Cuido Salud Hubenil ta mantene registro di vacunacion di tur mucha cu wordo vacuna pa Wit Gele Kruis y Cuido Salud Hubenil. Na cualkier momento cu un persona mester un certificado di su vacunacionnan pa bay di biahe of pa scol por pasa libremente na Cuido Salud Hubenil pa pidi esaki.

Nutricionista

Sobre peso y obesidad rond mundo y na Aruba ta un factor di riesgo halto cu ta causa hopi daño na salud di un poblacion. Estudionan haci ta mustra cu e problematica aki ta cuminsa cerca nos muchanan. E nutricionista di Cuido Salud Hubenil ta ofrece ayudo na mucha, mayornan y instancianan. Un mucha por wordo manda pa e nutricionista door di e enfermera of dokter di scol despues di su chekeo medico of mayor cu ta interesa pa conseho tambe por tuma contacto cu e seccion aki. E nutricionista ta duna conseho y guia na esnan cu tin problema di peso y tambe tocante dieta special (por ehempel diabetes of cholesterol halto).

E nutricionista ta desaroya programa educacional riba tereno di alimentacion y movecion. Y ta duna charla/workshop riba tereno di alimentacion y movecion.