Aruba alerta riba situacion den Continente Americano cu ta registrando aumento den casonan di Dengue

May 24, 2023

ARUBA- 24 05 2023. Den luna di april y mei 2023 paisnan den Region Latino America manera Argentina, Bolivia, Brazil Colombia, Peru y isla nan den Caribe manera Puerto Rico y Guadelopue a bati alarma riba aumento drastico di casonan di Dengue den nan pais. E situacion aki tin Departamento di Salud Publico di Aruba DVG riba un alerta y preparacion mirando cu Aruba ta un isla turistico cu ta ricibi diariamente turista for di diferente region e.o e region Latino Americano cu ta experenciando brote di Dengue.

Actualmente Aruba por lo general su indice di cantidad di sangura cu ta transmiti Dengue ta abou pa falta di yobida. Pero apesar di e falta di yobida, personal di seccion di GKMB semper ta sigui haña criadero di sangura na casnan den comunidad, den por ehempel scoternan bou di mata, vas cu awa vijver y hemchi di awa di airco y mas. Anticipando e temporada di yobida cu ta na caminda for di luna di juni pa december, si cada ciudadano no ta alerto y tuma accion nesesario door di tene nan cura y espacio liber di criadero, Aruba tambe por bay experencia un aumento den casonan di Dengue.

Den e prome 5 lunanan di aña 2023 seccion di Epidemiologia y Investigacion di DVG a ricibi un total di 24 notificacion di sospecho di Dengue di cual  10 caso di Dengue ta confirma pa laboratorio . Hunto cu dunadornan di cuido lo sigui monitor esaki di cerca.

Sintomanan di Dengue ta entre otro:

  • Keintura halto agudo
  • Dolor di cabez
  • Biramento di stoma y sacamento
  • Dolor di weso, joints y musculo
  • Dolor di wowo
  • Rash riba curpa

Departamento di Salud Publico ta pidi ciudadanonan cu presenta keintura halto y 2 of mas di e sintonanan aki riba menciona pa tuma contacto cu nan dokter di cas of dunador di cuido pa por haci e testnan nesesario y pa por ricibi e guia, cuido y supervicion nesesario.

Pa mas informacion like nos Facebook page Directie Volksgezondheid DVG Aruba, Follow nos riba Instagram directie_volksgezondheid_aruba, subi nos website www.dvg.aw, yama nos na 5224200 of mail nos na [email protected]

Privacy Policy | Disclaimer