Analisis y conclucion di cifrasnan di COVID-19 na Aruba

February 15, 2021

ORANJESTAD, Aruba –15 februari 2021: Desde Maart di aña 2020 te cu awe 15 di februari 2021 por señala cu un total di 7438 persona a keda registra positivo pa COVID-19 na Aruba. Di e 7438 personanan aki 7062 tawata resident di cual 68 a fayece a consequencia di COVID-19. Edad di esnan cu a test positivo ta varia, pero e grupo mas afecta ta e grupo di edad 25 pa 54 un grupo di edad hopi activo den nos comunidad. E 7062 residentenan positivo, ta representa un averahe di 6% di nos poblacion segun e ultimo cifrasnan di Centrale Bureau of Statistics Aruba.

Di e 7062 residentenan positivo 68 a fayece, cu ta representa casi 1% di esnan positivo. Entre esnan cu a fayece e edad average ta 74 aña, caminda e mas jong cu a fayece di COVID-19 tawatin 36 aña y esun di mas edad tawatin 94 aña. E grupo di edad unda mas persona a fayece ta 75 aña y mas grandi. Den e categoria aki 38 persona a fayece, di cual ‘cardio vascular disease’, obesidad, presion halto y problema di rion ta algun di e malesanan cu e personanan aki tawata sufri di dje.

Conclucion

Si tuma nota cu solamente un averahe di 6% di nos poblacion a test positivo pa medio di un PCR test y tambe teniendo na cuenta segun estadisticanan 50% di esnan cu bin den contacto cu e virus di COVID-19 ta desaroya sintoma. Esaki significa cu ainda un cantidad grandi di nos comunidad ta vulnerabel pa e virus, vulnerabel pa desaroya sintoma, complicacion y asta fayece pa motibo di COVID- 19.

Esaki ta e motibo pakico e vacuna contra COVID-19 ta di gran importancia pa nos poblacion. E cantidad di personanan cu ta proteha contra COVID actualmente ta relativamente abou compara cu esnan cu ainda ta na peliger di haya COVID, bira hopi malo y te asta fayece.

Solamente pa medio di e vacuna lo por brinda proteccion contra e virus. E vacuna lo proteha bo di haya un infeccion cu COVID, evita cu bo por haya sintomanan grave cu por tin consequencia fatal of di sigui plama e virus.

Privacy Policy | Disclaimer