Seccion Cuido Salud Hubenil ta informa Campaña anual di vacunacion escolar ta bay cuminsa

September 12, 2024

ARUBA- 12.09.2024. Departamento di Salud Publico pa medio di su seccion Cuido Salud Hubenil (Jeugdgezondheidszorg) ta encarga cu vacunacion di nos muchanan na Aruba. E programa di vacunacion Nacional ta wordo maneha pa Seccion Cuido Salud Hubenil y ta cuminsa for di baby na consultorionan di Wit Gele Kruis unda dokternan di seccion Cuido Salud Hubenil ta controla desaroyo y ta vacuna nos muchanan te cu edad di 4 aña. Despues di 4 aña e mucha su desaroyo y skema di vacunacion ta sigui wordo monitor pa Seccion Cuido Salud Hubenil na scol preparatorio y basico.

E vacunanan cu Seccion Cuido Salud Hubenil ta provee na nos muchanan ta e vacunanan regular DKTP, MMR y Hep B y desde algun aña a introduci e vacuna di HPV. E vacuna di DKTP ta proteha contra malesanan Difteria,Pertusis(Kinkhoest),Tetanus y Polio. E vacuna di MMR ta proteha contra e malesanan Sarampi, Cacheton y Sarampi Aleman. E vacuna di Hep B ta proteha contra Hepatitis B y e vacuna di HPV ta proteha contra Human Papillomavirus cu por ocaciona cancer na boca di matris cerca e hende muhe den su adultes.

Cu exepcion di e vacuna di HPV tur demas vacuna, DTP, MMR y Hep B, e mucha den scol basico a ricibi su prome dosis(nan) di e vacuna aki caba ora e tawata baby y na scol cu edad di 4 y 10 ta nesesario pa e haña su refuerso. Esaki segun skema di vacunacion Nacional.

Den e dianan cu a transcuri Seccion Cuido Salud Hubenil a manda un carta pa mayornan cu tin yiu den scol preparatorio of basico cu falta vacuna of mester ricibi un refuerso. E carta ta informa mayor di e vacuna cu e mucha mester ricibi y alabes ta pidi permiso di mayor pa e dokternan di Cuido Salud Hubenil y enfermeronan, vacuna e mucha na scol. Ta pidi tur mayor cu a ricibi e carta aki pa firma esaki y entrega esaki mas pronto posibel na scol.

E programa di vacunacion escolar aki ta existi pa mas di 70 aña y ta danki na e grado halto di vacunacion bou di nos muchanan cu den e temponan aki nos no ta mira of presencia mas e malesanan cruel cu antes tawata costa bida di mucha of tawata laganan handicap pa bida largo.

Ta hopi importante pa informa atrobe cu seccion Cuido Salud Hubenil no ta duna vacuna di COVID. Cualkier mayor cu ta desea mas informacion por tuma contacto cu nos seccion na 5224294.

Pa mas informacion like nos Facebook page Directie Volksgezondheid DVG Aruba, Follow nos riba Instagram directie_volksgezondheid_aruba, subi nos website www.dvg.aw, yama nos na 5224200 of mail nos na [email protected]

Seccion Cuido Salud Hubenil ta informa Campaña anual di vacunacion escolar ta bay cuminsa

Privacy Policy | Disclaimer