HumaanMetaPneumoVirus no ta causando precupacion pa Salud Publico di Aruba

January 7, 2025

ARUBA- 07.01.2025. Riba medionan di communicacion internacional por tuma nota cu ta ser papia hopi riba un potencial virus nobo na China cu ta hiba e nomber Humaan Metapneumovirus (hMPV). E realidad ta cu e virus aki no ta uno nobo, hMPV ta un virus cu desde 2000 a wordo identifica y ta circula rond mundo.

Na Aruba pa medio di nos sistema di vigilancia riba malesanan infeccioso respiratorio, Departamento di Salud Publico continuamente ta monitor virusnan circulando riba nos isla manera Influenza A, Influenza B, RSV, Parainfluenza, Adenovirus, Rhino virus,COVID-19 y tambe hMPV. Depende di e temporada di aña, bo por haya un aumento den caso nan di infeccion respiratorio causa door di un di e virus nan ariba menciona

Na e momentonan aki Departamento di Salud Publico di Aruba (DVG) pa medio di dato nan epidemiologico colecta, ta di opinion cu no tin motibo pa panico den comunidad tampoco introduci ningun medida pa cu e virus di hMPV. Den 2024, un total di 46 muestra (2.3% di 2032 muestra) a test positief pa hMPV.

E conseho cu DVG ta duna y ta sigui duna ta pa ta conciente y proteha bo mes y otro nan di tur tipo di virus of bacteria door di mantene un hygiena di man optimal. Laba man principalmente prome cu come y evita mishi cu boca, wowo y nanishi cu man no laba y tambe evita contacto cu hende cu tin sintoma respiratorio. Si bo ta experencia sintoma nan respiratorio, keda bo cas; evita di bay den hende (publico). Proteja bo mes y esnan vurnerabel (adulto mayor; esnan na estado; recien naci; y esnan cu un sistema inmunologico comprimi of malesa cronico)

DVG (via e canal nan oficial) lo sigui monitor menasanan pa cu salud publico internacional, regional y local pa por keda informa comunidad debidamente.

Pa mas informacion like nos Facebook page Directie Volksgezondheid DVG Aruba, Follow nos riba Instagram directie_volksgezondheid_aruba, subi nos website www.dvg.aw, yama nos na 5224200 of mail nos na [email protected]

Privacy Policy | Disclaimer